Kamis, 05 Maret 2009

NUTURANG TUAK LABUH

Jani liu anake ngorahang gumine ngancan-ngancan ngewehang. Sujatine, boya ja gumine sane ngancan-ngancan ngewehang, nanging tuah idupe, idup masyarakate utawi karma Baline. Sabilng wai ada gen anake keni byuta, ada ane malaksana ten patut utawi corah, ada masih ane demen mamunyah ring sisin margane lan lenan. Ane malenan pesan tuah buka raosne Pak Gede tekening Man Eblong di bale banjare.
“Pak Gede, Pak Gede nguda sungsut keto muan Pak Gedene, sungsut cara kaca sing masusut, kusut, nak kenkenne Pak Gede?”
“Man, Man, nguda kene lacur icange, jeg kanti telah sube kalung, jam tangane nganti panganggo ane luung-luung kaadep ulian anggon pasilih utange ane ngancan-ngancan ngedenang. Mirib kenken ya nasib icange? Suba keh icang raosang anak tiwas nektek teken krama banjare?”
“O, keto to undukne. Yan uli potongan, Pak Gede nak nu siteng oger, ganggas, yan undukne ane ento suba ada krama banjare ane ngeraosang”
“Uuunduk ane ken to Man?”
“Biiih cara sing nawang gen Pak Gede ne, nah Pak Gede, jani icang lakar nuturin Pak Gede unduke ento.”
“Kene to Pak Gede, dugase Pak Gede nu sugih meliah-liah tusing ngidang ben nelahang. Kema mai Pak Gede ngandeng anak luh, sabilang wai, tusing nawang galah, peteng lemah, jeg pragat in the hoy ke lain body apa adane totonan. Jeg pragat melenan gen anak luh ane gandeng Pak Gede. Kema mai di jalane, keluar masuk bungalow gen gaene. Pesu peteng, mulih das lemahe. Lemahe pules, petenge mamukal ka Bet Ngandang, Semawang, Danau Tempe, Padang Galak, jeg sube benyah latig baan Pak Gede. Kadi sing kena ben metek cewek-cewek café ane taen ajak Pak Gede pules. Ditu lantas, Pak Gede maan anakluh pangeret lantas Pak Gede kena aji jaran guying. Kema mai Pak Gede ajak nak luhe ento, tan marasa dewek Pak Gede, tusing inget teken panak somahe jumah, tan bina Pak Gede buka cicing pules di sisin bungut paone.”
“Kenken to Man ?”
“ Kene to, awakne anget ja, kewala bulune ngancan-ngancan kliskisan lantas metu dadi cicing gudig, ngedigig di rurunge. Ditu lantas orahine Pak Gede meliang panganggo ane bungah ngati Pak Gede ngadep kurenan Pak Gedene jumah ulian anggo melian yo penganggo. Nanging Pak Gede merasa liang, liang ulian man ngajak pules mulesin anak luhe ento tur kanti nyakitang bangkiang Pak Gede, ulian kanti telung ronda baan ngenemin anak luhe ento. Disubane telah sekayan Pak Gedene lantas Pak Gede boreh kayune, mulih Pak Gede, mekaki cina encik-encik mulih umah kurenan Pak Gedene. Nanging boya je melah ane tampi, tuah lacur nasib Pak Gedene, tampele pelengan Pak Gedene teken kurenanne, sigsigan Pak Gede ngeling kabilbil. Ditu lantas Pak Gede nyelek ati nyelek iba, merasa dewek Pak Gedene pelih, lantas suba Pak Gede mekamen di sunduk.”
“Apo to Man ?”
“Maselselan.”
“ Bih, makuah bibih Manne nutur unduk lacur icange, nanging mara karesep baan icang to Man, mula pelih pejalan icange.”
“Nah, eda to sangetange Pak Gede, jalan jani melah-melah idup ajak kurenan lan pianak jumah. Jeg suud suba ngalih gae ka kafe-kafe.”

Tidak ada komentar:

Posting Komentar