Madokaran, Malila cita, Ngiterin Denpasar

Sira sane uning indik kawentenan dokar, ring jamane dumun dokar wantah silih sinunggil alat transportasi darat. Dokar dahat maguna pisan rikala wenten anak pacang meleluasan nuju ka pasar utawi genah-genah sane tiosan. Nangingg mangkin kahanan dokare mangkin mawinang sedih. Napi mawinang ? Dokar sakadi pacadang kuang, nyadang sane kuang-kuang ngawinang nenten wentwn punapa-punapi.
Denpasar lan Pasar badung sane dumun, sakadi tan dados pesahang ring kawentenan dokar-dokare. Dagang-dagang ring pasisi Pasar Payuk, karma sane matumbasan ring Pasar Padung lan Kreneng ketah kaanter dokar.
Geginan pinaka kusir naenang ngadutin kayun pangripta lagu pop Bali, Anak Agung Made Cakra warsa 1970-an lintang antuk ngurit lagu majudul Kusir Dokar sanekasub ngantos mangkin. Ring lagu punika,I Kusir Dokar sane muat anak jegeg maponi kabaosang makejit mekenyor. Daging lagu sane girang lan baud punika kadi anut pisan ring kasujatian manah para kusir dokare, sane ngangken setata bagia ngiterin kota Denpasare.
Dados kusir wantah pilihan, saantukan dokar sane sampun wenten punika wantah tetamian saking panglingsirnyane. Pangsilan saking kusir dokar punika ring galahe mangkin nenten cukup anggen idup. Napi malih sesukat pariwisatane sepi ngancan-ngancan nenten prasida ngajeng kusir dokare. Panumpang wantah ngandelang saking turis-turis sane malali ka peken Badung lan meled menek dokar, tiosan ring punika nenten wenten malih sajabaning dagang jukut-jukutan sane kebelet tusing maan bati anggon mayah oto, ento mawinan mara menek dokar.
“Sampun byasa yening masan kenken titiyang sareng semeton titiyange sesame kusir dokar nenten molihang napi-napi. Sepi lipia nenten wenten penumpang. Yening nenten sangkaning sampun saking terehan titiyange dados kusir dokar, titiyang nenten pacang ngambil pakaryan puniki. Napi malih mangkin meweh pisan ngrereh padang anggen mamahan jarane sinah sampun sayan kajepit kawentenan kusir dokare. Durung malih ngidupin kulawarga, yening sakadi sapuniki terus kawentenannyane sampun mejanten pacang ngamedikang kawentenan dokare,” baos silih tunggil sopir dokar sane serahina-rahina nambang ring pasar Badung. Puniki taler wenten baos saking silih sinunggil warga sane seneng dados kusir dokar.
“Titiang seneng pisan dados kusir dokar, bagia pisan rasane ring duur dokare, keni angin ngesirsir turin mamargi maenggotan,” baos I Nyoman Suparma sane sampun 29 tiban dados kusir dokar.
Rasa bagia dados kusir dokar, duaning prasida makarya sinambi malila cita taler kaankenin olih I Ketut Unyil. Anak lanang sane nenten tamat masekolah punika nganikang saking kantun rare sampun mapangapti dados kusir dokar, mawinan dane nenten masekolah.
“Titiang uning lan seneng dados kusir dokar sangkaning saking cenik titian sampun kaajakin menek dokar olih bapan titiange. Titiang dados kusir dokar sangkaning keturunan, saking pekak kantos bapan titian. Wantah dados kusir dokar titian prasida makarya sambilang malilacita ngiterin kota Denpasar,” baosnyane.
Rasa bagia dados kusir dokar taler karasayang olih Fauzan saking Kepaon. Kusir dokar sane penambangannyane ring Kuta puniki nenten ja wantah seneng negakin dokar kemanten, dane taler seneng majaranan, ngubuh jaran sane mael tur mayasin jarannyane antuk pangangge sane mael.
“Jaran titiange puniki jaran mael, niki pecak jaran balapan. Titian nokarin jaran mael, rombong mael lan baju mael sangkaning seneng. Wenten kasenengan newek mayasin dokar. Semaliha jaran patut kekasihin sakadi i manusa saantukan jaran punika yening kasuen-suen kaubuh pacang madue paiketan rasa pantaraning sane ngubuh. Punika mawinan jaranmadue pangrasa.